nómadas queer

Este blogue forma parte do meu-nosso-vosso devir cyborg. Desta (re) invençom global da vida, dos afectos, dos prazeres, das relaçons sociais e pessoais. Parto de que a todas move-nos a mesma ilussom: o desejo de umha mudança radical, de umha outra vida, de um outro mundo.

Com algumhas de vós experimentei rebeldias passadas e presentes -Redes Negras, Mil Luas, Da Deriva, A Treu!, Maribolheras Precárias...Com outras, ademais, umha amizade infinita na distáncia; distáncia desmontada polas novas cartografias: Alfredo, que estás en San Luis potosi; Abdelhadi que estás em Marrakech; Diego, que estás em Londres; Elena, que estás en Asilah; Tére, que proximamente estarás em Acra; Pedrito, onte em Damasco, hoje em Sevilha, amanhá quem sabe. Outras sodes um recente e maravilhoso descobrimento: o enxame de Alternativas nómadas. Com outras de vós fluo nesse magma de despiporre hedonista que é a noite de High Mountain, território rebelde.

Boa parte de nós, creio que concordamos na articulaçom de um projecto emancipador (que nom é um, mas infinitos e múltiplos) que nom esteja organizado de forma autoritária, que gire ao redor de políticas próximas às necessidades individuais e colectivas sentidas e experimentadas e que, ao mesmo tempo, ofereça a esperança de transformar esta sociedade em algo novo e melhor. Evidentemente é um projecto político, ou melhor dito, contrapolítico ou pós-político, porque nom queremos saber nada desse detritus em descomposiçom que é a Modernidade, a forma-estado ou os partidos. E, por acima de todo, é um projecto vital. Vida e política nom som já separáveis, afortunadamente.

Vivemos neste presente globalizado umha transformaçom extraordinária cujos efeitos ainda nom somos capazes de imaginar. Mutamos. Mutar é conhecer, desfrutar, desenvolver-se, expandir-se, descobrir novos territórios, emprender umha viagem. Umha viagem na que nom podemos mais que conceber-nos como nómadas. Nómadas no seio da multitude ingovernável. Da Multitude desejante.